'O zampugnaro 'nnammurato [Spanish translation]

Nu bellu figliulillo zampugnaro,

Ch'a Napule nun c'era stato ancora,

Comme chiagneva, 'nnante a lu pagliaro,

Quanno lassaje la 'nnammurata fora.

E a mezanotte 'ncopp'a 'nu traìno

Pe' Napule partette d'Avellino.

Ullero – ullero,

Buono e sincero.

Da lu paese a Napule arrevato,

Nce cammenava comm'a 'nu stunato.

E succedette ca, 'na bella sera,

Jette a sunà a la casa 'e 'na signora.

Tappete, luce, pavimente a ccera,

Rricchezze maje nun viste anfin'allora.

Ma se 'ncantaje, cchiù assaje de 'sti rricchezze,

Pe' ll'uocchie d' 'a signora e pe' li ttrezze.

Ullero – ullero,

Fuje 'nu mistero

Quanno jette pe' vasà â signora 'e mmane

Zitto, sentette 'e dì: "Viene dimane!"

Cielo, e comme fuje doce 'sta nuvena

Ca ll'attaccaje cu 'n'ata passiona.

E se scurdaje 'e ll'ammore 'e Filumena

Ch'era fatecatora e bbona bbona.

Ma ll'urdema jurnata ca turnaje,

Chella signora, â casa, 'un ce 'a truvaje.

Ullero – ullero,

Sturduto overo,

Avette ciento lire e 'sta 'mmasciata:

"Scurdatavella, chella è mmaretata!"

'Na casarella 'mmiez'a li mmuntagne,

'Nu fucularo cu 'nu cippo 'e pigne.

'A neve sciocca e 'na figliola chiagne.

Chisà 'stu lietto 'e sposa si se 'ncigna.

P' 'a strada sulitaria d'Avellino

Nun sta passanno manco 'nu traìno.

Ullero – ullero,

Cagna penziero:

Sta sotto a 'nu barcone appuntunato,

Poveru zampugnaro 'nnammurato.