'A gènte ca me véde 'e sentinèlla
'nnanze a stu vascio da 'a matina â séra:
"Ma chisto" dice "ha pèrzo 'e ccerevèlle?
Ma cómme? S'è cecato 'e 'sta manèra?"
E invéce, i' vòglio bene a na figlióla,
ca sta 'int'o vascio e nun è vasciajòla.
No, stu vascio nun è vascio,
è na règgia. È 'a mèglia règgia.
E sissignóre, 'o pate è masterascio.
E sissignóre, 'a mamma è 'mpagliasègge.
Ma hanno fatto chélla figlia
ch'è na vèra meraviglia,
ca pe sbaglio è nata llà.
'A mamma dice: "No, signóre mio.
A stà ô sicóndo piano? Nun sia maje".
E 'o pate dice: "Quant'è cèrto Dio,
io 'nchian'e tèrra ce sto' buòno assaje".
E intanto, ‘a figlia, chélla bèlla zita,
vo' stà cu llòro quanno se mmarita.
No, stu vascio nun è vascio...
E ajeresséra me so' appiccecato
cu 'e genitóre miéje ch'hanno raggióne.
Papà, ch'è pronipóte 'e titolato,
dice: "E addo' va a ffernì chistu blasóne?"
Ma i' pènzo ca pe duje uócchie 'e brillante,
scénne 'a cavallo pure nu rignante".
No, stu vascio nun è vascio...