Ne schöne Jrooss lyrics

Ahn su ’nem Daach, wo minge Kühlschrank jejähnt hätt,

Ming Depris ahn mir kläävte, zähflüssig, vollfett,

Ming Breeftäsch leer wohr un wo absolut nix ahnliejen däät,

Wo ich zom zigste Mohl de Naas vun mir vollhatt,

Trotzdäm für alles en Erklärung parat hatt,

Noh drei, vier Bier schon ahn däm Punkt wohr, wo mir nix mieh jet määt,

Daach ich: Verdammp noch mohl, die Jrübeltour bringk et nit,

Die trick dich raff, die bringk dich runder wie sons nur jet,

Die fuck dich aff bess zo däm Punkt, wo övverhaup nix mieh klapp.

Dann hängste nur noch röm un zweifels ahn dir,

Un wirfs dir alles, wat de finge kanns, vüür,

Bess sujar neidisch op die Typen, die du sons nur beduhrs.

’Ne schöne Jrooß ahn all die, die unfählbar sinn,

Vun nix en Ahnung hann, die ävver immerhin

Su dunn als ob, weil op Fassade, do stonn se halt drop.

Dä Durchblickprofi uss däm Bausparverein,

Rundömjebräunt, met Frau un Pudel doheim,

Met singer Einbauköch, die rustikal ess, ävver dennoch modern,

Met singem Rallyestreifen-Opel GT,

’Ner Stehplatz-Mitte-Jahreskaat vum FC,

[Der op Wunderbäumche un op Fell-Lenker steht,]

Dä op Charles Bronson [„Terminator“] praatjemaate, akkurate Freizeit-Abziehbild-Held,

Dä Naach für Naach bess zom Projrammschluss em Sessel hängk,

Dä veezehn Daach Benidorm paradiesisch fingk,

Zwei Johr beim Bund wohr, weil ihm Männerkameradschaff jefällt,

Dä freut sich jetz ald op sing Zokunft als Rentner,

Op dä Balkon met Liejestohl, denn do pennt er,

Bess e’ die Löffel affjitt, die e’ selvs ald lang ni’ mieh hätt.

’Ne schöne Jrooß ahn all die, die unfählbar sinn,

Vun nix en Ahnung hann, die ävver immerhin

Su dunn als ob, weil op Fassade, do stonn se halt drop.

Die ärm Säu hängen drin enn Situatione,

Die nur erklärbar sinn durch Hirnamputatione,

Die hann se noh und noh em Jleichschritt Richtung Schwachsinn jescheck.

Oh, leeven Orwell, ’84 ess noh,

’T sinn mettlerweile nur noch vier läppsche Johr,

Et läuf su ähnlich aff, nur unauffällig un vill raffinierter jemaat.

Dä Trick, dä funktioniert janz zügig un reibungslos:

Etappenweise Entmündigung klapp famos,

Freiwillig enjemaat un stekum zom Verblöden gebraat.

Noch zo empfähle wöhr däm janze Komplott:

Schenkt jedem einzelne doch ’ne Aufblasbar-Gott

Uss Venyl, abwaschbar, exakte Maße, verbraucherjerecht, jeföhlsecht.

Met schönem Jrooß ahn all die, die unfählbar sinn,

Vun nix en Ahnung hann, die ävver immerhin

Su dunn als ob, weil op Fassade, do stonn se halt drop.