ناس وناس [Nas w nas] lyrics

في ناس ماتت عشان تعبر وترفع يا بلدى اسمك

وناس عاشت عشان تهجر وتهبر وتنهش حتّة من جسمك

في ناس حاربت عشان عرضك روت من دمّها أرضك

وأدّت يا وطن فرضك بدون لحظة ما تتردّد

في ناس ماتت عشان مبدأ سنين بسلاحها فى الخندق

ومين ممكن يكون أصدق من اللى عشانك استشهد؟

في ناس ماتت بلا زفة وسابت مصرنا واقفة

ولو اتحط فى الكفة بطل منها بجيش كامل

لا تعرف يعنى إيه تطبيع ولا معنى إنك إنت تبيع

تاريخ أمة خلاص بيضيع بوهم اسمه سلام شامل

في ناس قضت على الجبهة سنين مكويّة بلهبها

تاريخنا عمره ما جابها ولا سجّل حكايتها

لا سألت على مكاسبها ولا العيلة اللى هاتسيبها

ولا كانت بتحسبها.. وضحت راضية بحياتها

في ناس حاربت ومش عايزة ولا تكريم ولا جايزة

وقابلت ربها فايزة بجنّاته ورضوانه

وناس عاشت عشان تحرق وطن وفى ثروته تسرق

وتحزن حتى لو يغرق فلا عاشوا ولا كانوا

في ناس لاجل البلد صنعت ملامح نصر بيه رفعت

رقابنا فوق ولا طمعت فى نيل منصب ولا شهرة

في ناس لاجل البلد قاست وفوق المستحيل داست

وناس من بعدها عافت فساد فى أرضك الطاهرة

من الشهدا فى عبور الجيش إلى الشهدا فى طابور العيش

سنين وفاتت ما قدرتيش تصونى نصرك الغالى

في ناس سرقت ثمار النصر.. وباعت كل حاجة فى مصر

وخليتنا نعيش فى عصر مهيش بلدى ولا مالى

وأنا مالى وأنا مالى