Nanneddu meu, su mundu est gai,
a sicut erat non torrat mai.
Semus in tempos de tirannias,
infamidades e carestias.
Como sos populos cascant che cane,
gridende forte: «Cherimus pane ».
Famidos, nois semus papande
pan'e castanza, terra cun lande.
Terra che a fangu torrat su poveru
senz’alimentu, senza ricoveru.
B'est sa fillossera, impostas, tinzas,
chi nos distruint campos e binzas.
Undas chi falant in Campidanu
Trazan tesoros a s'oceanu.
Cixerr'in Uda, Su Masu, Assemene
Domos e binzas torrant a trèmene.
E non est semper ch’in iras malas
intrat in cheja Dionisi Iscalas.
Terra si papat, pro cumpanaticu.
bi sunt sas ratas de su focaticu.
Cuddas banderas numeru trinta
de binu 'onu, mudadu ant tinta.
Apenas mortas cussas banderas
non puùs s'osservant imbreagheras.
Amig'a totus fit su Milesu,
como lu timent, 'che passant tesu.
Santulussurzu cun Solarussa
non sunt amigos pius de sa bussa.
Semus sididos in sas funtanas,
pretende s'abba parimus ranas.
Pejus su famene chi, forte, sonat
sa janna a totus e non perdonat.
Abocadeddos, laureados,
bussacas buidas, ispiantados
in sas campagnas papan mura,
che crabas lanzas in sa cesura.
Cand'est famida s'abocazia,
cheres chi penset in Beccaria?
Mancu pro sónniu, su quisitu
est de cumbincher tant'apetitu.
Poi, abolidu pabillu e lapis
intrat in ballu su rapio rapis.
Mudant sas tintas de su quadru,
s'omin'onestu diventat ladru.
Sos tristos corvos a chie los lassas?
Pienos de tírrias e malas trassas.
Canaglia infame piena de braga,
cherent s'iscetru, cherent sa daga!
Ma non bi torrant a sos antigos
tempos de infàmias e de intrigos.
Pretant a Roma, mannu est s'ostaculu;
ferru est s'ispada, linna est su báculu.
S'intulzu apostulu de su Segnore
si finghet santu, ite impostore!
Sos corvos suos tristos, molestos,
sunt sa discordia de sos onestos.
E gai chin totus faghimus gherra,
pro pagas dies de vida in terra.
Dae sinistra 'oltad'a destra,
e semper bides una minestra.
Macos, famidos, ladros, baccanu
faghimus, nemos alzet sa manu.
Adiosu, Nanni, tenet'a contu,
faghe su surdu, 'ettat'a tontu.
A tantu, l'ides, su mundu est gai:
a sicut erat non torrat mai.