Nîkolayev Popoviç lyrics

Ne qulingê Evdalê min perr bi nexşin,

Ne qanatê birîndarin jor diweşin,-

Cote gemiyê zirîkirî serî perin,

çar hewarê erşê ezmîn zor digerin.

Zûda çûne perwaz dane ser Hebeşe,

Ji ser çevê evd hildane ava reşe...

û kubarin nav gemyada herdu cêwî,

Ji ber pêşa ulim welidî bûne rêwî.

Ser tevekê jor hiltêne hildiqoşin,

Ro - hîvêra dewîkarin, şert û qoşin.

Qey bêjî ro ber "Vostoka" dilerize,

Serê hîva rûbixêlî ber wan nimze.

Bera ezmîn hev dikeve, kefa gewire,

Ku ber gemya zû direve mîna ewire:

Dewlê berê kaw-kubarin, pêle safî,

Xoznebar lê sovekarin bi şitafî.

şewq û şepal, nûr û neder wanra xemle,

Ulimê dewirê destê wanda sêr û remle.

Li ser pêla serbest, aza ewan syarin

û li xizna binê berê ha dîndarin.

O ber çine, vir wextekê evidê ji wir

Bera bînin, dewsê topkin lal-cewahir:

Yan ji erda ber-okyana bibin ezman,

Dewsê bavên bax û baxçe, rez û bostan.

Dive mîna zom-zozanê evan heça

Her havîna Marsê mera têkin daça:

Hesok ji wir bilûrêxe ewê demê,

Zelxê vir nav êmanekî here hemê...

û dibe em dewsa yêr û warê benda

Ezmên têkin ciyê dewata û govenda,

û wê hingê hîva zer jî xwe têkin text,

Wexun eşqa evan şêrêd xwey nav û bext.

***

Gulnaz, wekî minra yarî, îda min çi derde,

Piş min çiyayî û beyarî, çî min çel û nerde.

çevê teda soz-îmane, min qirar û şerte,

Te sîng çayîr û çîmane, minra war û erde.

Muhbeta te min bihare, sufet teva şerqe,

çi xema min hewa sare, zivistana serte...

Hub-evîna te esmerê dermanekî merde,

Nakim xofê jera merê, xayîn û nemerde...

Minra dinya û alemî, şîrin, de xeberde,

Hezar lutbî û kilamî ez hilînim ber te...