Daghi sa fortuna ti ‘oltat sas palas
e ses chin s’isetu ‘e justissia terrena
o ancora pius de justissia divina
t’arbeschet sa vida in àndalas malas.
Tenia una domo, como no apo nudda,
sas frunzas de chercos mi faghen dimora
su cantu ‘e su ‘entu acumpagnat dogn’ora
sos passos ch’incertos nde pesan sa tudda.
Dae sos birdes montes rios de abba pura,
sa zente, sas domos, sa creja, sa ‘idda,
su ‘olu ‘e s’astore, su nuscu ‘e s’armidda
s’acheran in bisu in oras de tristura.
Ue fistis, Deus meu,
cando fit cuss’ingannia
mere de sa mente mia?
Mi an cundennadu pro s’irballu fattu
e annu chin annu sa paga est chitada
ma torra s’istòria de Pontziu Pilatu,
gai an detzisu a cusciéntzia cagliada.
In cust’aposentu s’ànima est afflita
su sole est cuadu in chelos biaitos
finas in s’istiu m’arpilin sos fritos,
ammentos de una die malaita.
Meresset justissia peràula imponente
pienat sa ‘ucca de cantos potentes,
chie pius de a mie ‘nde an fattu chentu
e su mere pagados, liberos che bentu.
Ue fistis, Deus meu,
cando fit cuss’ingannia
mere de sa mente mia?
Si m’iscultas, Deus meu,
pone fine a s’ingannia,
lughe nostra chi ses bia.