Meşşateyê husna ezel
çengalê zulfan tab-i da
Da `işq-i hil bit pêli-pêl
Qelbê me bê cellab-i da
Husna hebîb û lutfa yar
Avête dil `işqa xedar
Lew selb-i kir jê ixtiyar
Wê husnê ev îcab-i da
Min dî seher zulfên di mest
Hatin sema ihram-i best
çûn secdeya xalê bi qest
Lew haciban mihrab-i da
Rûh û rewanê min hebîb
Dîsa bi telbîsa reqîb
Rencîde kir miskên xerîb
Terka dilê ehbab-i da
Mehbûb û reyhan pir gulav
Ker kir li min cerg û hinav
Zehra helahil bû di nav
Lew saqî ew cullab-i da
Wan dest û zend û sa`idan
Mey dane şeyx û zahidan
Mestî be çeşmê şahidan
Ew nêrgiza sîrab-i da
Miskê reşandî ez dibêm
Wan nuqteyan hin bûne kêm
Lê xettê reyhanî li dêm
Katib ji nû i`rab-i da
Nazikqeda nûrînbeşer
Ew bû li min neqşê beser
Dîna xiyalê her seher
Nav dîde`ê bêxwab-i da
Ew tilliyên nazik reqîq
Pir da me fincana `eqîq
Ew badeya nûrîn rehîq
Minnet bi min wehhab-i da
Da xef nebit bejna ferê
Mey hate şehkasa sirê
Minnet ko îro dêmdurê
Dîsa şeraba nab-i da
Mey hate fincana sedef
Kes dê vexwit îro bixef
Saqî bi çeng û nay û def
Ferfûriya mehtab-i da
`îd e w hebîbê nezre lê
Yan dê bi qurban bî Melê
Ya reb bibînim roj hilê
Sikkîn di dest qessab-i da