Mas, com m'ave, Deus m'aiut,
Qu'era, can cut chantar, plor
Seria ja per Amor
Que m'a sobrat e vencut
E per amor no.m ve jais
Si fai donc per que m'irais
Ni que.m fai languir
Que non o sabria dir
C'aissi m'es esdevengut
Tot leu que perc ma valor
E solatz no m'a sabor.
Esdevenc anc mais a drut
Drutz sui eu no ni m'en lais
C'ades am forseis e mais
E volh e dezir
No sui drutz qui.m pot sofrir
Qu'era, car sol ai volgut,
Me tenh per fin amador!
Amaire, si Deu azor,
Sui eu fis e no.m remut
Lo coratge ni.l biais
D'amar leis per cui sui gais.
Be pauc tem falhir!
Donc per que planh e sospir
Car ben ai reconogut
C'Amors no.m val ni m'acor.
No.m val et am la gensor
Del mon no m'a pro valgut
No per re ans dic que.m trais,
Can me det trebalh e fais
E.m fetz encobir
So que no.m pot avenir.
E com non ai receubut
Assatz de ben e d'onor
De las mas de Mo-Senhor
Si ai! mais an retengut
E que un conven! que.m frais
Aicel que l'ira m'atrais
E.m fara morir,
Sol qu'en son atur no.m vir.
Desvol so que l'a plagut
Non o sai. ja mer melhor!
Si.n trac mal c'om c'al greujor
Dezira mais de salut
N'Antic, e no.us par assais
Diatz oc, que, s'ilh ja.m bais,
Segur posc plevir
C'aucire.m pot o garir.
Mas sai m'a mo dol cregut
Us clams que fan entre lor
Cilh d'Urgel, per que.lh pluzor
Seran mort e confondut!
Que.lh comtess'ab cui jois nais
E sabers e pretz verais
S'en cudet eissir,
Qui lo.lh volgues consentir.
Be.ls tenrai totz per savais,
Si la.n letz eissir,
E.l rei, s'o vol consentir.