Fit una die de iberru mala e fritta,
fit bentu, fit frocande a froca lada
e Marïedda, totu tostorada,
ghirabat chin sa broca dae Istiritta.
Buffàndesi sas ungras, poberita...
fachiat a cada passu s'arressada,
e dae sa fardetedda istratzulada
nch'essiat un'anchichedda biaita.
Mentras andabat gai arressa arressa,
istabat annotàndesi sa froca
ch'imbïancabat una murichessa,
cando trabucat e - a terra sa broca! -
Mariedda pranghende tando pessat
chi li catzan su frittu chin sa soca!