Maria Giovanna Cherchi - Amore

Beni, dami sa manu, isfortunadu,

tue ses dignu de s’istima mia.

Lottende in d’unu mare de angustia

custu virgine coro as meritadu.

Cantas bortas pro me as deliradu

sonniende a cudda càndida Maria

chi t’est presente a ti narrer: “Isvia

su dolu, ca dae issa ses amadu”.

Eo so cudda ch’amas, caru fiore,

ch’abbandono ridende su giardinu

pro t’ind’acher de mene possessore.

Eo so cudda ch’amas, caru fiore.

Beni duncas, non vivas in pibinu

nen fathende unu sonniu de amore,

biti sa testa in s’amorosu sinu.

Beni duncas, non vivas in pibinu.

Eo so cudda ch’amas, caru fiore,

ch’abbandono ridende su giardinu

pro t’ind’acher de mene possessore.

Eo so cudda ch’amas, caru fiore.