I
Ckarisitu na atun ckaaspa,
mamayta ‘rimacherani.
Pay “Mana, mana, nishcaptin”,
llajtaymanta llojserani.
Bolsilluyshcka na silbajta
suj tiempota purerani.
Virgen Mámay chacuyaptin
llamcanáypaj tarerani.
Ckaanquilla cara ckarita,
llámcaj ‘ris madrugadaspi,
quirusninta huajtanachiy
chirimanta chá ckasaspi.
Huasiyshmanta llojsistacka
regaliascka tucucun;
aguantapunaishmitían
imalayataj amuchun.
II
Anchami sajra casckascka
sujpa pagunpi causaycka.
“Ckaya mincha, ‘ris sufrinqui”,
niajlla cara mamaycka.
Mamay pobrecitatacka,
manapajmi cásoj cani.
“Tata Yayami mackáan
chayraycupajcha”, nej cani.
Huasiypecka, sumajllata,
gustuymant cáusaj carani.
Mamay mateta cebaptin,
camáyllap úpiaj carani.
Chayraycu mamayraycocka,
mamayraycu huáckaj cani,
mamáypaj cántaj churácoj,
mamayman cunan ‘rishcani.