Libero Bovio - Pupatella

Quanto ve prègo, continuate,

chést'è 'a serata d' 'e ttarantèlle.

State abballanno? E abballate,

ca nun mme 'mpòrta 'e niénte

mo ca, 'mpruvvisamènte,

só' asciuto a llibertà.

Pecché triémme? Nun hê 'a tremmà,

jammo, abballa, nun fà abbedé.

E ride, ca si ride si' cchiù bèlla,

Pupatè'.

E abballa 'a tarantèlla,

ca i' tèngo mènte a tte.

Mm'hanno menato quatto palómme

ca só' arrivate dint' 'e ccancèlle.

Stéva signato nu nòmme,

'o nòmme 'e chist'amico

ca vò' abballà cu tico

pe' fà nu sfrèggio a me.

Pecché triémme? Nun hê 'a tremmà,……

Dint' 'e ccancèlle, ciérti mumènte,

sti mmane a morze mme só' magnàte.

I' nun capévo cchiù niénte.

Dicévo: "E cómm'è stato

s'i' stóngo carcerato

p'èssa?" Pe tté. Pe tté.

Viene, abballa, strìgnete a me,

quanno abballe si' sempe tu.

'O vi' ll'amico tujo ca sta tremmanno,

Pupatè'.

'O ssape ca i' te scanno,

ma nun t'ajuta a te.