لازم غيّر النظام [Lazem Ghayyir El Nizam] [Turkish translation]

الآخرون هم الجحيم

يوميا ذات الوجوه، ذات الإشيا

بتوععا، بتتحمم

بتتححم من كذب المجتمع اللي معلق عليك

ضجيج، غبرة، عجقة سيارات

ذات الأخبار، معارضة، موالاة

بتموت وبتعيش مية مرة

و ما حدا مهتملك

كل إنسان عايش بجحيمو

كل إنسان عم بيدور بمأساتو

مفتكر معو الحق

الغلط عم بيزيد ... عم بيزيد

و إنت... حامل السلم بالعرض

برج العقرب صار بمدار التنك

عم بيدور الكون بعكس الفلك

و رجال الحديد قلدو الملك

عايش بالروتين بشقة صغيرة

عصفور و سجين البنايه كبيرة

و عم بدور الأرض بدوامة كبيرة

من بعيد الإشيا بتشوفا أجمل

الأنظمه والناس و الحب الأول

لما تصير قريب كل شي بيتبدل

مكتوبة الرشوه بفنجان القهوه

القبض من المجهول قصيده حلوة

و المدير إنسان و المال بيغوي

أنا مش قادر غيري وضعي

ما عندي قوة تغيير

عم بتهدم وحدي وساكت

صار في حقد و ذل كتير

فوضى، جنون، وليش أنا وحدي

بدي إمشي عالنظام

يمكن حتى غير وضعي

لازم غير النظام 2

يمكن الخلل نابع من شعبي

كل شي بيتزبط ولا شغله صعبه

ناخب و نايب و بدور اللعبه

سياية المال شو فيك تقلا

خلايق، ملل، طوايف الله

هدمو الأديان، هجرو الله

يا ريت بتتغير مرة ها الدوره الكونيه

و لعبة الأنظمه الحرة بترجع إنسانيه

روتين نظام بيقتل، إنت بسجنو محبوس

بالسجن بتنتحر مرة، انتحر بالحريه

أنا شعبي و حامل هموم و نازل صوب الإنكسار

مهما تصرخ ما بيقومو، الصرخه بقوة إنفجار

ليش الأنظمة بتقرر شغلك، نومك و موتك

قرر نظامك لحالك، وَعِّي فيك الإختيار 2

ها العالم لوين رايح؟

و لك صبُرو ع بعضكن

الكل مستعجل

كل واحد بدو حالو

ما حدا بيشعر مع التاني

ما بقى في مرُوّه

ضغط، بشاعة، فلتان

ما عاد في روابط و قيم

انكسرت الصداقة

كل شي صار محلل

الإستغلال، الغش

بس تغتني بسرعة

و مع هيدا و كلو، و الفقر راح ياكل الناس

البلد صار أغنيا و فُقرا

قديش بدك تعاند

وصلت عنقطة "اللاعوده"

يا بتنتحر، يا بتهاجر، يا بتفُوت باللعبه

فتش ع خلاصك

أنا مش قادر غيري وضعي

ما عندي قوة تغيير

عم بتهدم وحدي وساكت

صار في حقد و ذل كتير

فوضى، جنون، وليش أنا وحدي

بدي إمشي عالنظام

يمكن حتى غير وضعي

لازم غير النظام

أنا شعبي و حامل هموم و نازل صوب الإنكسار

مهما تصرخ ما بيقومو، الصرخه بقوة إنفجار

ليش الأنظمه بتقرر شغلك، نومك و موتك

قرر نظامك لحالك، وَعِّي فيك الإختيار