Lacreme napulitane lyrics

Mia cara madre, sta pe' trasì Natale

e a stà luntano chiù me sape amaro!

Comme vurria allummà duje o tre biancale!

Comme vurria sentì nu zampugnaro!

A 'e ninne mie facitele 'o presepio

e a tavola mettite 'o piatto mio!

Facite quanno è 'a sera d''a Vigilia

comme si mmiezo a vuje stesse pur' io!

E ce ne costa lacreme st'America

a nuje, napulitane!

Pe nuje ca ce chiagnimmo 'o cielo 'e Napule,

comm'è amaro stu pane!

Mia cara madre, che so', che so' 'e denare?

Pe chi se chiagne 'a patria nun so' niente!

Mo tengo quacche dollaro e me pare

ca nun so' stato maje tanto pezzente.

Me sonno tutt''e notte 'a casa mia

e d''e criature mieje ne sento 'a voce,

ma a vuje ve sonno comm''a na Maria

cu 'e spade mpietto, 'nnanz''o figlio ncroce.

E ce ne costa lacreme st'America

a nuje, napulitane!

Pe nuje ca ce chiagnimmo 'o cielo 'e Napule,

comm'è amaro stu pane!

M'avite scritto che Assuntulella chiamma:

chi l'ha lassata, sta luntano ancora.

Che v'aggi''a dì? Si 'e figlie vonno 'a mamma,

facitela turnà a chella "signora"!

Io no, io no, i' me ne resto fore

e resto a faticà pe tutte quante.

Io c'aggio perzo patria, casa e onore,

io so' carne 'e maciello, so' emigrante!

E ce ne costa lacreme st'America

a nuje, napulitane!

Pe nuje ca ce chiagnimmo 'o cielo 'e Napule,

comm'è amaro stu pane!