Ea casa vissìn aea cascata
Coverta de vigne sensa ùa
E de scarpìe
Ea saveva da marmeata e de confusion
E de scuro
De autuno
De giovinessa
De eternità
Intorno ghe gèra
El siensio
E vrèspe
I nidi dei osèi
'Ndavimo a pescar
A gàmbari col monsignor
Faxevimo el bagno tuti nui, al scuro
Coe putèe
E coi aranati
Ea casa vissìn dei paeassi de l'Ater
Ghe gà assà spassio ae fabriche
E al supermercà
I albari i xe sparìi, ma se sente spussa de vòvi marsi1
De benxina
De guèra
Ea xente
No ea xe cussì mal
E xe normal
Xe el (prèsso del) progresso.
1. El àsido solfidrico sa spussa da vòvi marsi