Kapky [Esperanto translation]

Gutoj da roso, gutoj da pluvo,

gutoj da ŝvito, gutoj da sango.

Tio estas amo.

Diru hodiaŭ kaj morgaŭ ankoraŭ,

ankoraŭ la vorteton centan kaj unuan.

Tio estas amo.

Vorteto, unufoje senprotekta kaj dronanta

kiel papera kolombo,

kiun faligis la vento.

Kaj alifoje suno fluanta,

kiam la rido kaj la ploro estas inverse

kaj la frenezulo estas reĝo.

Gutoj da ĉielo, gutoj da tero,

gutoj da lumo, gutoj da marĉo.

Tio estas amo.

Ĝi ŝprucos el mi, ĝi ŝprucos el vi.

Unufoje malbona kaj alifoje sankta.

Tio estas amo.

Ĝi estas kiel febro sub la haŭto, senfina dezerto

kaj dormo, venkanta la gardantaron –

ĝi estas falado elalte.

Kaj alifoje bele ardigita ellasilo,

kiam vi ene mortas pro feliĉo

kaj deziras doni.

Per amo dum majo elarbiĝas

la tenera ŝelo el la betuloj.

La amo fluas kiel sevo.

Diru, diru kiam vi

unuafoje trinkis tiun vinberon kun la salo1

kaj vi timis, ke la amo ekdoloros vin

guto post guto.

Gutoj da beateco, gutoj da bonodoro,

gutoj en la ruinoj de falintaj fortikaĵoj.

Tio estas amo.

Nuda en marĉo, nudpieda en dornoj,

en la okuloj dolĉan vertiĝon pro teruro

portas la amon.

Ĝi marŝas en ŝirita ĝinzo, ne demandas sin kiom ĝi aĝas,

kaj sur la murojn desegnas duoblan ombron

kaj duoblan vizaĝon.

Kiam ĝi venos, ĝi senpekigos la tutan mondon

kaj ĉiun grandan revon, kaj ĉiun heroaĵon,

kaj pluvon, kaj brilon.

Per amo la flugaj vortetoj

iĝas poeziaĵoj.

Per amo la steloj en la mallumo

alfluas al ni en gutoj.

Kaj kiel la tono volas denove soni per la kordo,

tiel la homo deziras, dum li volas vivi,

trinki gutojn da amo. (×3)

1. Mi pensas, ke la salo tie ĉi signifas larmojn.