لو كنت بس ساعتها عارف ان دى المرة الأخيرة
مية مية كانت هتفرق فى الوداع
كنت هحضن سندس اللي فتانية تالت عالمشاع
واحنا طالعين ماللجان بعد اخر امتحان
واسالها لو بتشوف فلان
طب فاهمة مادة ميس ايمان؟
طب ينفع ابقى اجيلكو عادي ؟
قصدي يعني البيت يساع ؟
لو بس كنت ساعتها عارف .. كانت هتفرق فالوداع
كل الشوارع والمباني اللى مش هدخلها تاني
والأغانى اللى لما سمعتها دندنتها من مرة واحدة مالسماع
يا كل حاجة كسبتها او سيبتها
مقدرتش اشبع منها اكمنها
قالت هنروح من بعض فين
يا ناس يا عبط يا عشمانين
فيه فرصة تانية للقى؟
... بطلو اوهام بقى
كفاية احلام واسمعوا
عيشوا بزمة وودعوا كل حاجة بتعملوها وكل حد بتشفوه
عيشوا مشاهد كل مشهد زي ميكون الاخير
اشبعوا ساعة الوداع واحضنو الحاجة بضمير
داللي فاضل مش كتير ...اللي فاضل مش كتير