Jubanna [Spanish translation]

Sétia in s’oru ‘e sa ziminera,

chin sos ocros chi pompian su focu,

janna aperta cara a sa carrera,

intendes sas campanas a tocu.

Jubanna, sa cara sinzada

dae su tempus chi como est colande,

tribulìa, che malefadada,

sa zoventude l’as bida bolande…

Diventas manna chene tinde abbizare,

orfanedda, no as connottu jocu,

custrinta de andare a secare

fasches de linna chin sa lagrima in s’ocru.

Oh natura chi moghes sos bentos

pro facher issire lamentos,

daemi fortza pro sichire a gherrare

in custa vida chi non podes amare…

Como chi ses betza e incanìa

Contas contos in modu gentile

A netas tuas e nepodes

A bucca aperta iscurtande a tibe,

cosas chi no an connottu

e fortzis no an a connoschere gai,

su tempus est colande pro totus,

dies e notes chi non finin mai…

A cumpanzu sa mala fortuna

in sas notes de abba e de bentu

isetande chi torret su sole

pro ti dare unu pacu ‘e cuntentu…

A cumpanza s’umbra ‘e su fochile,

sas campanas s’intenden a tocos,

duas pesantes lagrimas ti rughen

chi ti surcan su belu ‘e sos ocros...

Sétia in s’oru...