Ir vil minneclîchen ougenblicke [German translation]

Ir vil minneclîchen ougenblicke

rüerent mich alhie, swann ich si sihe,

in mîn herze, owê sold ich si dicke

sehen, der ich mich für eigen gihe!

eigentlîchen dien ich ir:

daz sol si vil wol gelouben mir.

Ich trage in mînem herzen eine swaere,

der ich von mir lâzen niht enmac,

bî der ich vil gerne tougen waere

beide naht und ouch den liehten tac.

des enmac nû niht gesîn:

ez enwil diu liebe frowe mîn.

Sol ich mîner triuwe alsust engelten,

so ensol niemer man getrûwen ir.

sie vertrüege michels baz ein schelten

danne ein loben, daz geloubent mir.

wê war umbe tuot si daz,

der mîn herze treit vil kleinen haz?