Nun me canusce cchiù? Embè ch'è stato?
A me mme pare ca so' tale e quale.
Nun so' cchiù ardènte cómme p'o passato
ma, certamènte, nun te vòglio male.
Primma me 'ntussecavo 'a vita mia
e mo m'a piglio cu filosofía.
Cade 'o munno? E che me 'mpòrta!
Mòre 'a ggènte? E ch'aggi' 'a fá!
Si' scuntènta? E cchell'è 'a pòrta.
Si' cuntènta? E statte ccá.
No, giòja bèlla, nun me 'mpòrta 'e niénte.
Io me so' fatto 'o primmo 'ndifferènte.
E pássate na mano p'a cusciénza
e pènza quanta tuósseco m'hê dato.
Dice: "Ma mo chedè st'indifferènza?"
"E pòrto 'o ségno ca me so' stracquato".
Si 'o pugne cu na spíngula stu còre
io crédo ca nun sènte cchiù dulóre.
Cade 'o munno? E che me 'mpòrta!
Mòre 'a ggènte? E ch'aggi' 'a fá!
Si' scuntènta? E cchell'è 'a pòrta.
Si' cuntènta? E statte ccá.
No, giòja bèlla, nun me 'mpòrta 'e niénte.
Io me so' fatto 'o primmo 'ndifferènte.
T'òdio? E pecché? Farria tròppa fatica.
Po che m'hê fatto? Nun m'hê fatto niénte.
Mo faccio 'o cunto ca tu si' n'amica
ca vòglio bène 'ndifferentemènte.
'O vvi' st'ánema mia ch'è addeventata?
E ppure quanto, quanto t'aggio amata.
Cade 'o munno? E che me 'mpòrta!
Mòre 'a ggènte? E ch'aggi' 'a fá!
Si' scuntènta? E cchell'è 'a pòrta.
Si' cuntènta? E statte ccá.
No, giòja bèlla, nun me 'mpòrta 'e niénte.
Io me so' fatto 'o primmo 'ndifferènte.