هەڵبەستی دەروون [Halbasti Darun] lyrics

هەر چەند ئەکەم، ئەو خەیاڵەی پێی مەستم

بۆم ناخرێتە ناو چـوارچێـوەی هەڵبەسـتم

لێک دانەوەی دەروون ، قسەی زمانم

بۆچی وەهـا دوورن لە یەک ؟ نازانم!

ئەمویست دەروون بکرایەوە وەک تۆمار

دەرکەوتایە دنیای جوانـتر لـە بەهار

دەرکەوتایە؛ ئاوات ، هیـوا ، خەو بینین

پرشنگدارتر لە ئەستێرەی قوبەی شین

دەرکەوتایە؛ مانای مەنگی دەریایی

کە نەرمە با لە ڕووی ئەدا ئەسپایی

دەرکەوتایە ئـەو دنیـایە کـە شـیعری

بێ فرمێسکە و زۆرتر لە فرمێسک ئەگری

زەردەخەنەی بێ ئاوێنەی دەم و چاو

تیشكـێـک ئـەدا ڕووناکـترە لـە هەتاو

بەڵام ئەفسوس! کە ئەو شیعرە جوانانە

باڵدارێـکن جـێ ناهـێـڵن هێـلانـە

لە ناوەوە ئەجریوێنن ، ئەخوێنن

هەرگیز قەڵەم بە کاغەزا ناهێنن!