Granum Sinapis [English translation]

In dem begin

hô uber sin

ist ie daz wort.

ô rîcher hort,

dâ ie begin begin gebar!

ô vader brust,

ûz der mit lust

daz wort ie vlôz!

doch hat der schôz

daz wort behalden, daz ist wâr.

Von zwên ein vlût,

der minnen glût,

der zweier bant,

den zwein bekant,

vlûzet der vil sûze geist

vil ebinglîch,

unscheidelîch.

dî drî sîn ein.

weiz du waz? nein.

iz weiz sich selber aller meist.

Der drîer strik

hat tîfen schrik,

den selben reif

nî sin begreif:

hîr ist ein tûfe sunder grunt.

schach unde mat

zît, formen, stat!

der wunder rink

ist ein gesprink,

gâr unbewegit stêt sîn punt.

Des puntez berk

stîg âne werk,

vorstentlichkeit!

der wek dich treit

in eine wûste wunderlîch,

dî breit, dî wît,

unmêzik lît.

dî wûste hat

noch zît noch stat,

ir wîse dî ist sunderlîch.

Daz wüste gût

nî vûz durch wût,

geschaffen sin

quam nî dâ hin:

us ist und weis doch nimant was.

us hî, us dâ,

us verre, us nâ,

us tîf, us hô,

us ist alsô,

daz us ist weder diz noch daz.

Us licht, us clâr,

us vinster gâr,

us unbenant,

us unbekant,

beginnes und ouch endes vrî,

us stille stât,

blôs âne wât.

wer weiz sîn hûs?

der gê her ûz

und sage uns, welich sîn forme sî.

Wirt als ein kint

wirt toup, wirt blint!

dîn selbes icht

mûz werden nicht,

al icht, al nicht trîb uber hôr!

lâ stat, lâ zît,

ouch bilde mît!

genk âne wek

den smalen stek,

sô kums du an der wûste spôr.

Ô sêle mîn

genk ûz, got în!

sink al mîn icht

in gotis nicht,

sink in dî grundelôze vlût!

vlî ich von dir,

du kumst zu mir.

vorlîs ich mich,

sô vind ich dich,

ô uberweselîches gût!