Ganzer fröiden wart mir sô wol ze muote lyrics

1.

Ganzer fröiden wart mir sô wol ze muote:

mirst geboten, daz ich singen muoz.

sælic sî diu mir daz wol verstê ze guote!

mich mant singen ir vil werder gruoz.

diu mîn iemer hât gewalt,

diu mag mir wol trûren wenden

unde senden

fröide manigvalt.

2.

Gît daz got, daz mir noch wol an ir gelinget,

- seht, sô wære ich iemer mêre frô -,

diu mir beide herze und lîp ze fröiden

twinget. mich betwang nie mê kein wîp

alsô. ez was mir gar unbekant,

daz diu minne twingen solde

swie si wolde,

unz ichz an ir bevant.

3.

Süeze Minne, sît nâch dîner süezen lêre

mich ein wîb alsô betwungen hât,

bit si, daz si ir wîblîch güete gegen mir

kêre, sô mag mîner sorgen werden rât.

durch ir liehten ougen schîn

wart ich alsô wol empfangen,

gar zergangen

was daz trûren mîn.

4.

Mich fröit iemer, daz ich alsô guotem wîbe

dienen sol ûf minneclîchen danc.

mit dem trôste ich dicke trûren mir vertrîbe

unde wirt mîn ungemüete kranc.

endet sich mîn ungemach,

sô weiz ich von wârheit danne,

daz nie manne

an liebe baz beschach.

5.

Minne, wunder kann dîn güete liebe machen

und dîn twingen swenden fröiden vil.

jô, dû lêrest liebe ûz spilnden ougen lachen,

swâ dû mêren wilt dîn wunder spil.

dû kanst fröiderîchen muot

sô verworrenlîche verkêren,

daz dîn sêren

sanfte unsanfte tuot.