Frouwe, vernemt durch got von mir die mære lyrics

1.

Frouwe, vernemt durch got von mir die mære:

ich bin ein bote und sol iuch sagen,

ir sulnt wenden einem ritter swære,

der si lange hât getragen.

daz sol ich iuch künden sô:

ob ir in welt fröiden rîchen,

sicherlîchen

des wirt manig herze frô.

2.

Frouwe, enlât iuch des sô niht verdriezen,

ir engebt im hôhen muot.

des muget ir und alle die wol geniezen,

den ouch fröide sanfte tuot.

dâ von wirt sîn sin bereit

ob ir in ze fröiden bringet,

daz er singet

iuwer êre und werdekeit.

3.

"Jâ möhte ich mich des an in niht wol gelâzen,

daz er wol behüete sich.

krumbe wege, die gênt bî allen strâzen,

dâ vor got behüete mich.

ich wil nâch dem rehten varn,

ze leide im, der mich anders lêre.

swar ich kêre,

dâ müeze mich doch got bewarn."

4.

Frouwe, sendet im ein hôchgemüete,

sît an iuch sîn fröide stât.

er mag wol geniezen iuwer güete,

sît diu tugent und êre hât.

frouwe, gebt im hôhen muot!

welt ir, sîn trûren ist verkêret,

daz ez in lêret,

daz er daz beste gerne tuot.