Frouwe, lânt iuch niht verdriezen lyrics

1.

Frouwe, lânt iuch niht verdriezen

mîner rede, ob si gefüege sî.

möht ichs wider iuch geniezen,

sô wær ich den besten gerne bî.

wizzent daz ir schœne sît,

hânt ir, als ich mich verwæne,

güete bî der wolgetæne,

waz danne an iuch einer êren lît.

2.

"Ich wil iuch ze redenne gunnen,

sprechent swaz ir went, ob ich niht tobe.

daz hânt ir mir an gewunnen

mit dem iuwern minneclîchen lobe.

ichn weiz ob ich schœne bin,

gerne hete ich wîbes güete,

lêrent mich wie ich die behüete,

schœner lîp der touc niht âne sin."

3.

Frouwe, daz wil ich iuch lêren,

wie ein wîb der werlte leben sol.

guote liute solt ir êren,

minneclîch ansehen und grüezen wol.

eime solt ir iuwern lîp

geben für eigen umb den sînen,

frouwe, woltent ir den mînen,

den gebe ich umb ein sô schœne wîp.

4.

"Beide an schouwen und an grüezen,

swâ ich mich dar an versûmet hân,

daz wil ich vil gerne büezen,

ir hât hovelîch an mir getân.

tuont durch mînen willen mê,

sît niht wan mîn redegeselle,

ichn weiz nieman dem ich welle

nehmen den lîp, ez tæte ime lîhte wê."

5.

Frouwe, lânt mich ez alsô wâgen,

ich bin dicke komen ûz grôzer nôt.

und lânt ez iuch niht betrâgen,

stirbe aber ich, sô bin ich sanfte tôt.

"hêrre, ich wil noch langer leben,

lîhte ist iuch der lîp unmære,

waz bedorfte ich solher swære,

solt ich mînen lîp umb iuwern geben."