Flor groga [Sardinian [southern dialects] translation]

Ge ddu scieus cantu ti praxit a artziai su bratzu e calculai de cali parti ndi benit su bentu,

ge dd’eus apretziada sa manera stilosa chi scioras cando t’indi andas currendi,

ge dd’eus cumprendiu chi ses un’anima bandulera chi lassat is domus candu funti totus dromìus,

chi ti praxit a papai candu nc’est gana e dromiri si ti pigat su sonnu.

Però pensadiddu beni chi a pustis, imoi o agoa, arribat sempri su momentu

chi s’oberit che unu frori raru s’arrepentimentu.

E cumprendis, comenti chi tot’is bruscias de su mundu s’atobiessint po ti liggi su benidori,

chi est chistioni de tempus chi t'indi surprendas pensendi chi ddu tenìasta,

chi deu creemu in tui.

Ge ddu scieus chi tremila avventuras si funti tzachendi cun feli atesu de custu arrenconi,

chi is gherreris s’arroscint si no nc’est nudda de fai.

Ge dd’eus prevìdiu chi as a morri sceti si calincunu t’inci cravat unu stoccu de òru in su coru

e chi aundi unu bon’homini t’inc’interrit ingunis 'nci at a cresci unu chercu forti.

E agiumai est geniosu chi t’indi scarescias aici in pressi chi arribat sempri su momentu

chi s’oberit che unu frori grogu s’arrepentimentu.

Chi dd’iast a sciri comenti chi tot’is bruscias de su mundu ti fessint ghetendi una mazina,

una rima antigoria chi t’at a fai arregordai chi ddu tenìasta,

chi deu creemu in tui.

Chi m’ind’em'a pesai fattu a rei, em’a acorrai is Cortis po’nci poni in su codixi penali

de proibiri a sa genti de bagamundai buschendi cosas chi non si podint mancu nomenai.

Ca sa timorìa iat essi ingunis ma fortzis, tanti po cambiai, ieus a imparai a dda binci imparis

e non t’em'a biri mai prus spieghendimì ita beni chi t’intendiasta candu ddu teniasta,

candu deu creemu in tui.