Fiume Sand Creek [English [Scots] translation]

Thay reft our hert awa aneth a mirkie blanket

Aneth a muin deid in its bairntime we sleepit free o fears

It wes a general twinty year auld

Blae in the een jaiket the samen

It wes a general twinty year auld

Son o a blouster

Thare a siller dollar liggin on the bed o Sann Creek.

Our weirmen ower faur awa on the steid o the bison

An thon hyne-awa muisic gat louder, aye louder

Thrice I steikit my een

Yince mair I kent I wes thonder

I speirt o my granda wes ’t jist a draem

An granda said aye

The fishes is singin whiles on the bed o Sann Creek.

Sae strang wes my draems the bluid tuim’d doun frae my neb

Levin-flauchts in the tae lug an paradise in the tither

The peeriest tears

The meiklest tears

Whan the tree o snaw

Bluim’d wi reid starns

The bairnies is sleepin nou on the bed o Sann Creek.

Whan the sun heistit his heid abuin the shouthers o nicht

Thare wes naethin but dugs an reek an whumml’t tents

I cuist a flane at the lift

Tae gar it breathe

I cuist a flane at the wunn

Tae gar it bleed

Seek for the third o the flanes on the bed o Sann Creek.

Thay reft our herts awa aneth a mirkie blanket

Aneth a muin deid in its bairntime we sleepit free o fears

It wes a general twinty year auld

Blae in the een jaiket the samen

It wes a general twinty year auld

Son o a blouster

The bairnies is sleepin nou on the bed o Sann Creek.