(I) Emperaire, per mi mezeis,
sai, quant vostra proez'acreis,
no.m sui jes tarzatz del venir;
que jois vos pais, e pretz vos creis,
e jovens vos ten baut e freis
queus fai vostra valor techir.
(II) Pois Io Fiils de Dieu vos somo
que.l vengetz del ling Farao,
ben vos en devetz esbaudir;
c'outra.ls portz faillen li baro,
lo plus, de conduich e de do:
e ja Dieus nols en lais gauzir!
(III) Mas en Gels de lai es ramas,
ad ops d'Espaigna e del Vas
en devetz ben l'afan sofrir,
e.ls sarrazis tornar atras
e d'aut orguoill far venir bas:
e Dieus er ab vos al fenir.
(IV) Als amoravis saill conortz
per las poestatz d'outra.ls portz
qu'an pres una tel'ad ordir
de drap d'enveia e de tortz,
e ditz cadaus qu'a sa mortz
.s fata de sa part devestir.
(V) Mas de lai n'ant blasme li ric
c'amon lo sojorn e l'abric,
mol jazer e soau dormir,
e nos sai, segon lo prezic,
conquerrem, de Dieu per afic,
l'onor e l'aver el merir.
(VI) Trop s'en van entr'els cobeitan
aicill que vergoigna non an
e.is cuion ab l'aver cobrir;
et ieu flic lor, segon semblan,
que.l cap derrier e.ls pes denan
las cove dels palaitz issir.
(VII) Per pauc Marcabrus non trasaill
de joven, quan per aver faill;
e cel, qui plus l'am'acuillir,
quan venra al derrier badaill
en mil marcs non dari'un aill,
sii li fata la mortz pudir.
(VIII) Ab la valor de Portegal
e del rei navar atetal,
ab sol que Barsolona.is vir
ves Toleta l'emperial,
segur poirem cridar "Reial!"
E paiana gen desconfir.
(IX) Si non fosson tan gran li riu
als amoravis for'esquiu,
e pogram lor o ben plevir;
e s'atendon lo recaliu
e de Chastella.l seignoriu,
Cordoa.ill farem magrezir.
(X) Mas Franssa, Peitau e Beiriu
aclin'a un sol seignoriu,
veign'a Dieu sai son fieu servir!
(XI) Qu'ieu non sai per que princes viu
s'a Dieu no vai son fieu servir.