الجار للجار [El Jar lil Jar] [Transliteration]

قالوا نبي شعر الوطن، قلت من وين

أبدا وانا كلي مشاعر لهالدار

قالوا نبي وصف الهجن قلت غالين

(لكن يكفي ما سمعتوه في (اعمار

قالوا نبي شعر الغزل قلت بعدين

بعد ما اسمعكم تفاصيل الأخبار

لو الشعر يكتب بليا مضامين

بحر وقافية فقط دون الأفكار

في اسبوع واحد أنشر اربع دواوين

لكن أنا شاعر وتنقده شعّار

وتردد بيوته قلوب المحبين

اللي على قمرى قوافيه سمّار

تطرب بدون أوتار لا قال بيتين

وتزيدها طربة تقاسيم الأوتار

لو كان جمهوري فقط واحد اثنين

ما كنت ألفت كل ما جيت الأنظار

من (الفجيرة) ناس غالين غالين

لكن لأهل الشعر قيمة ومعيار

أعشق جماهيري من (الشارقة) لين

حدود (راس الخيمة) ديار الاخيار

وما بين (أم القيوين) ألقاهم وبين

عجمان) وان رديت لـ (دبي) تحتار)

(تلقاهم من (دبي) لين آخر (العين

لـ (ابوظبي) دار المكارم والاحرار

ومن (الامارات) الوفا للملايين

أهل الخليج اللي لهم ستة أقطار

للمملكة دار الحرم قبلة الدين

اللي يصلي صوبها فوق مليار

وفي حكم (ابو متعب) حفيد العزيزين

اللي طغى شوره على كل الأشوار

و (عمان) يا أهل الخير ما حن بناسين

وشلون ننسى دولة طوال الاشبار

الشعب والسلطان (قابوس) باقين

على محبة بعضهم سر واجهار

إلى (قطر) دار الشيوخ الكريمين

اللي لها شعبٍ عظيمٍ ومغوار

أرسل تحياتي بورد ورياحين

على (تميم) أميرها سقم الاشرار

ويا مملكة (بحرين) في القلب بحرين

بحرين ود وشوق والشعب يختار

عاش الملك والشعب لجله موالين

لعيون (ابو سلمان) شعب الوفا ثار

ويعيش جمهور (الكويت) المسمّين

في ظل شيخٍ ما على مجده غبار

دار (الصباح) اللي يرد المعادين

والشعب يهتف باسمه كبار وصغار

شعري لجمهوري .. لذلك أنا حين

أكتب أمتّعكم بدون أي تكرار

عموماً .. أبغيكم فقط مستعدين

ما دام حن الرعد والغيم مدرار

وبخلي المعنى لكم بين قوسين

ولن أصرح بها رغم كل ما صار

ركز معي يا أيها المستمع زين

لا تحاول تدور مع نفسك أعذار

اللي ما بين الجار والجار ساعين

بالعار مكسبهم من أعمالهم عار

حنّا عرب ، ولنا سلوم وقوانين

نموت ما نرضى مهونة على الجار

الحقد لو ينمو ما بين البساتين

يجفف الأنهار وتموت الأزهار

والحب لو يسكب على صبخة الطين

لا بد ما ينبت خزامى ونوّار

تبقى سلاطين المعالي سلاطين

أسماؤهم وأمجادهم دايم كبار

ما تحقر العالم لو بنظرة العين

ولا يزعزع عرشها كل ثرثار

من يقدر يحلل كلام المجانين

أبغيه يشرح لي خفيّات الاسرار

والبحر مصدر ما ولا هم بدارين

يتبخر وينزل على هيئة أمطار

النار منها نور بس المساكين

ما يدركون النور جزء من النار

والعالم اللي يعبدون الشياطين

على محاربهم أنا عندي اصرار

السن فيه السن ، والعين بالعين

والبادي أظلم والكفو ياخذ الثار

نمشي على هدى النبي مستقيمين

والله سبحانه هو النافع الضار

واللي يسوي له سوالف على مين

الناس تدري فيه والوقت دوّار

يطيح مقداره من القلب ويشين

لو كان له منصب وهيبة ومقدار

واللي يود الصلح ويحارب البين

هذاك اللي قلبه على بلاده يغار

حب الوطن نقرن عليه البراهين

بأفعالنا من قبل ما نقرن أشعار

نحن اتحدنا قبل واحد وسبعين

بقلوبنا واتوحدت عقبه الدار

تتوحد بفكرة رجالٍ عريبين

بأنساب تبقى ما هي أنساب تنهار

في ظل وحدتنا على الحق راسين

زعيمنا (بن زايد) الوالد البار

أقصد (خليفة) والشيوخ العظيمين

اللي لهم سيفٍ على الظلم بتّار

الله يعز شعوبنا ، قولوا آمين

ولا يفرق وحدة طوال الأعمار