انا يا ابن التراب من التراب ولا عليه زود
سوى انه الله عززني ولي قدري ولي شاني
خلقت اعرف مقامي وين وانّ الجود باهل الجود
وإنّ الاّول الاّول .. وأنّ الثاني الثاني
أبد ماني بحاجة من يعلّم قلبي المنقود
أعرفه قبل ما اعرفك لانّ ابويْ رباني
ولا تحسب كلامي لك عتب ما في المعاتب فود
ولا تحسب شموخي ينكسر لو عشت وحداني
حسبت انك هدية عمر و انك لي غلا وورود
ولكن خابت امالي وبان الغدر بازماني
على الله لو فهمت القصد والاّ فاتك المقصود
انا ما عاد يعنيني ولا فرقاك عنَّاني
أنا ببقى مثل ما انا شموخي للسما ممدود
لانّ الطيب من طبعي واترفع عن الداني
وأنا اكبر من التّحجيم .. راسي شامخٍ كالطود
ومتحدي شموخي من تحدّى باس وجداني
وجودك والعدم واحد ولا كنّك ابد موجود
ولا قربك رفع شاني ولا في بعدك اعاني
انا ذوق وحياتي ذوق وكل طيبٍ لطيبي يعود
نسيتك قبل ما تنسى مع انك صعب تنساني