احكي بهمسك حبيبي توّها تغفي جروحي
لا تصحيها ترى تنويمها عندي صعب
ليه متأخر حضورك ؟
راحت أيامي وروحي !
لي ثلاث سنين بحدادي على قول العرب
احرجوني في سؤالي عنك وما اقوى ابوحي
كل ما قالولي وينه ؟
قلت .. ما ربي كتب !
ايش أجاوب ؟
وانت داري عارف الحال بوضوحي
من يصدقني إذا قلت الفراق بلا سبب ؟!
توّها تنزل دموعك !
جعلها تكفير نوحي ..
الله يسامحك مابي أدعي بلحظة غضب
صرت ماضي في حياتي وانت بالماضي طموحي
دارت الدنيا وياما دارت الدنيا عجب !
خذ جنودك من خفوقي ما بقى لك بي فتوحي
جيشك اللي مارحمني .. بعد مافاز .. انغلب!
لا تجيني ودي تنسى دربي وترحم جروحي
خلها تغفى طلبتك هذا هو آخر طلب