Diss Naach ess alles drinn lyrics

„Waarewäsche, Moselstrooß, beim ‚Jet’“,

Steht he, ”aushilfsweise” –

Klar, paar Mark extra wöhr janz nett.

Suwiesu, op Dauer weed mer’t leid,

Wemmer nur der janzen Daach met ’ner Jummilimo

He ahm Büüdche steht.

Jede Veedelstund ’ne Bus,

’T steich wer en, et steich wer uss.

Su ’n Veedelstund ess janz schön lang,

Un eez en Woch ens - Mann oh Mann!

Dat mem Sonja ess wohl vorbei,

’Sch hann’t jo kumme sinn

Sick dä Niete met dä Liehrstell Anfang Mai.

Ich jläuv, ihr Mutter ess dodraan schuld,

Ihr Dochter künnt jet Bessres hann, säät se,

Naja, wat soll’t?

Jlisch kütt dä Andy mem Escort,

Singem blaue 69er Ford,

Un dann maach mer eine drop,

Diss Naach hällt uns keiner op!

Diss Naach, do jilt et,

Diss Naach simmer widder wer!

De Nord-Süd-Fahrt ropp un raff

Un dann de Altstadt krüzz un quer.

Friedaach hammer endlich,

Mohndaachmorje ’ss noch lang hin,

Kumm, schmieß der Jang rinn, Andy,

Diss Naach ess alles drin!

Wat hällste vun ’ner Opwärmrund, eimohl öm de Stadt?

Echt, dat Feeling op der linke Spur ’ss der Hammer,

Nä, Jung, dat kriej ich nit satt.

Selvs et schärfste Teil em Spillsalong ess dojääje nix,

Dä Winker drusse un et Fernleech ahn,

Ruudekirche, Bocklemünd, Bayerkrüzz.

Dann cool der Ring raff op Brautschau,

Schön langsam, Andy, ich weiß jenau:

Diss Naach, do hann mir zwei en Chance,

Jetz kumm mir bloß nit, du hätts Angs!

Diss Naach, do jilt et,

Diss Naach simmer widder wer!

De Nord-Süd-Fahrt ropp un raff

Un dann de Altstadt krüzz un quer.

Friedaach hammer endlich,

Mohndaachmorje ’ss noch lang hin,

Kumm, schmieß der Jang rinn, Andy,

Diss Naach ess alles drin!

Luhr, wie die Neonleechter uss- un ahnjonn, wa’ ‘ss met Kino? Stemmp, zo spät.

Oh nä, für Disco hann ich keine Nerv,

Wat dodrin affjeht, ess mer echt zo blöd.

Da’ ‘ss fass noch schlemmer wie ’n Studentekneip, Mensch, wohr dä Vujel verkrampf,

Dä, dä uns letzte Woch bekehre wollt,

Dä Spezialist met singem Klassenkampf.

Kumm, Jung, mer driehe noch en Rund,

Duhrt suwiesu nur noch en Stund,

Dann weed he’t Trottoir huhjeklapp,

Die hahl mer durch, maach bloß nit schlapp!

Diss Naach, do jilt et,

Diss Naach simmer widder wer!

De Nord-Süd-Fahrt ropp un raff

Un dann de Altstadt krüzz un quer.

Friedaach hammer endlich,

Mohndaachmorje ’ss noch lang hin,

Kumm, schmieß der Jang rinn, Andy,

Diss Naach ess alles drin!