Dirai vos senes duptansa
D'aquest vers la comensansa!
Li mot fan de ver semblansa!
–Escoutatz!–
Qui ves Proeza balansa
Semblansa fai de malvatz.
Jovens faill e fraing e brisa,
Et Amors es d'aital guisa
De totz cessals a ces prisa,
–Escoutatz!–
Chascus en pren sa devisa,
Ja pois no·n sera cuitatz.
Amors vai com la belluja
Que coa·l fuec en la suja
Art lo fust e la festuja,
–Escoutatz!–
E non sap vas qual part fuja
Cel qui del fuec es gastatz.
Dirai vos d'Amor com signa!
De sai guarda, de lai guigna,
Sai baiza, de lai rechigna,
–Escoutatz!–
Plus sera dreicha que ligna
Quand ieu serai sos privatz.
Amors soli' esser drecha,
Mas er'es torta e brecha
Et a coillida tal decha
–Escoutatz!–
Lai ou non pot mordre, lecha
Plus aspramens no fai chatz.
Greu sera mais Amors vera
Pos del mel triet la cera
Anz sap si pelar la pera!
–Escoutatz!–
Doussa'us er com chans de lera
Si sol la coa·l troncatz.
Ab diables pren barata
Qui fals' Amor acoata,
No·il cal c'autra verga·l bata!
–Escoutatz!–
Plus non sent que cel qui·s grata
Tro que s'es vius escorjatz.
Amors es mout de mal avi!
Mil homes a mortz ses glavi,
Dieus non fetz tant fort gramavi!
–Escoutatz!–
Que tot nesci del plus savi
Non fassa, si·l ten al latz.
Amors a uzatge d'ega
Que tot jorn vol c'om la sega
E ditz que no·l dara trega
–Escoutatz!–
Mas que puej de leg'en lega,
Sia dejus o disnatz.
Cujatz vos qu'ieu non conosca
D'Amor s'es orba o losca
Sos digz aplan'et entosca,
–Escoutatz!–
Plus suau poing qu'una mosca
Mas plus greu n'es hom sanatz.
Qui per sen de femna reigna
Dreitz es que mals li·n aveigna,
Si cum la letra·ns enseigna!
–Escoutatz!–
Malaventura·us en veigna
Si tuich no vos en gardatz
Marcabrus, fills Marcabruna,
Fo engenratz en tal luna
Qu'el sap d'Amor cum degruna,
–Escoutatz!–
Quez anc non amet neguna,
Ni d'autra non fo amatz.