Dich lobet der hôhen engel schar [Leich D] [German translation]

Dich lobet der hôhen engel schar,

doch brâhten si dîn lob nie dar,

daz ez volendet wurde gar,

daz ez ie wurde gesungen

in stimmen oder von zungen

ûz allen ordenungen

ze himel und ûf der erde,-

des mane dich, gotes werde:

Wir bitten umb unser schulde dich,

daz dû uns sîst genædiclîch,

sô daz dîn bete erklinge

vor der barmunge urspringe.

sô hân wir den gedinge,

diu schulde werde ringe,

dâ mit wir sêre sîn beladen.

hilf uns, daz wir si abe gebaden

Mit stæte wernder riuwe

umbe unser missetât,

die nieman âne got

und âne dich ze gebenne hât!