Derê meyxaneya `işqê seher `arif ziyaret kir
Bi ab-i çeşm û xwîna dil wudû best û teharet kir
Werîn cama hilalê da ji `eksê mah-i new bînî
Ko xanê mihr û cergê çerx û xewanê roze xaret kir
Bi mîzan qewsê mahê new li wechê dilberê min dî
Ji çeşm û guşe`ê ebrû bi dor camê işaret kir
Bi ebşaran nezer min çû ji çerxê qewsê ebrûyan
şukurxaz în ko çehvan karê ber `eyn-i beşaret kir
Ji ber dêmê niqab avêt û destûra tewafê da
Di se`yê Beyt û ihramê we min eswed ziyaret kir
Di dîdarê hezaran can nisarê meqdemê yar in
Kesê canan bi can bînit di `işqê wî ticaret kir
Bi dînarê dinê zinhar da yarê xwe tu nefroşî
Kesê Yûsif firotî wî di `alem da xesaret kir
Tinê ew secdeya şukrê te bir mihrabê qewseynan
Ko delq û şeml û seccade bi vê avê qesaret kir
Di behsê le`l-i leb her xam-i narit teb`ê elmasê
Welê te`sîr û feydê mihrê tedbîrê heraret kir
Di i`cazê beyanê da suxen ger bête inşafê
Dizanit muxteşer her kes Melê sihre`ibaret kir