Der meie der ist rîche lyrics

1.

Der meie der ist rîche:

er füeret sicherlîche

den walt an sîner hende.

der ist nû niuwes loubes vol;

der winter hât ein ende.

2.

"Icu fröwe mich gegen der heide,

der liehten ougenweide

diu uns beginnet nâhen"

sô sprach ein wolgetâniu maget:

"die will schône enpfâhen.

3.

Muoter, lâz âne melde.

jâ will ich komen ze velde

und will den reien springen.

jâ ist ez lanc daz ich diu kint

niht niuwes hôrte singen."

4.

"Neinâ, tohter, neine!

ich hân dich alterseine

gezogen an mînen brüsten:

nû tuo ez durch den willen mîn,

lâz dich der man niht lüsten."

5.

"Den ich iu will nennen

den muget ir wol erkennen.

ze dem sô will ich gâhen:

er ist genant von Riuwental:

den will ich umbevâhen.

6.

Ez gruonet an den esten

daz alles möhten bresten

die boume zuo der erden.

nû wizzet, liebiu muoter mîn,

ich belig den knaben werden.

7.

Liebiu muoter hêre,

nâch mir sô klaget er sêre.

sol ich im des niht danken?

er spricht daz ich diu schoenste sî

von Beiern unz in Vranken."