Der in den ôren siech lyrics

Der in den ôren siech von ungesühte sî

daz ist mîn rât der lâz den hof ze düringen frî

was kumet er dar dêswâr er wirt ertoeret

ich hân gedrungen unz ich niht mê gedringen mac

ein schar vert ûz ein ander in naht unde tac

grôz wunder ist daz ieman dâ gehoeret

der lantgrâve ist sô gemuot

daz er mit stolzen helden sîne hab vertuot

der iegeslîcher wol ein kenpfe wære

mir ist sîn hôhiu fuor wol kunt

und gulte ein fuoder guotes wînes tûsent pfunt

dâ stüende doch niemer ritters becher lære.