Das Hildebrandslied [Dutch translation]

Ik gıhorta dat ſeggen

dat ſih urhettun ænon muotın

hıltıbrant entı hadubrant untar herıun tuem

ſunu fatarungo ıro ſaro rıhtun

garutun ſe ıro gudhamun gurtun ſih ıro ſuert ana

helıdoſ ubar rınga do ſie to dero hıltu rıtun

hıltıbrant gımahalta herıbranteſ ſunu her uuaſ heroro man

feraheſ frotoro her fragen gıſtuont

fohem uuortum ƿer ſin fater ƿarı

fıreo ın folche …

eddo ƿelıhheſ cnuoſleſ du ſiſ

ıbu du mı enan ſageſ ık mı de odre uuet

chınd ın chunıncrıche chud ıſt mın al ırmındeot

hadubrant gımahalta hıltıbranteſ ſunu

dat ſagetun mı uſere lıutı

alte antı frote dea erhına ƿarun

dat hıltıbrant hættı mın fater ıh heıttu hadubrant

forn her oſtar gıhueıt floh her otachreſ nıd

hına mıtı theotrıhhe entı ſinero degano fılu

her fur laet ın lante luttıla ſitten

prut ın bure barn unƿahſan

arbeo laoſa her raet oſtar hına

deſ ſid detrıhhe darba gıſtuontum

fatereſ mıneſ dat uuaſ ſo frıuntlaoſ man

her ƿaſ otachre ummet tırrı

degano dechıſto untı deotrıchhe

darba gıſtontun her ƿaſ eo folcheſ at ente ımo ƿaſ eo peh&a tı leop

chud uuaſ her … chonnem mannum

nı ƿanıu ıh ıu lıb habbe …

ƿettu ırmıngot quad hıltıbrant obana ab hevane

dat du neo dana halt mıt ſuſ ſippan man

dınc nı gıleıtoſ …

ƿant her do ar arme ƿuntane bauga

cheıſurıngu gıtan ſo ımo ſe der chunıng gap

huneo truhtın dat ıh dır ıt nu bı huldı gıbu

hadubrant gımahalta hıltıbranteſ ſunu

mıt geru ſcal man geba ınfahan

ort ƿıdar orte …

du bıſt dır alter hun ummet ſpaher

ſpenıſ mıh mıt dınem ƿuortun ƿılı mıh dınu ſperu ƿerpan

pıſt alſo gıalt& man ſo du eƿın ınƿıt fortoſ

dat ſagetun mı ſeolıdante

ƿeſtar ubar ƿentılſeo dat ınan ƿıc furnam

tot ıſt hıltıbrant herıbranteſ ſuno

hıltıbrant gımahalta herıbranteſ ſuno

ƿela gıſihu ıh ın dınem hruſtım

dat du habeſ heme herron goten

dat du noh bı deſemo rıche reccheo nı ƿurtı

ƿelaga nu ƿaltant got quad hıltıbrant ƿeƿurt ſkıhıt

ıh ƿallota ſumaro entı ƿıntro ſehſtıc ur lante

dar man mıh eo ſcerıta ın folc ſceotantero

ſo man mır at burc enıgeru banun nı gıfaſta

nu ſcal mıh ſuaſat chınd ſuertu hauƿan

breton mıt ſinu bıllıu eddo ıh ımo tı banın ƿerdan

doh maht du nu aodlıhho ıbu dır dın ellen taoc

ın ſuſ heremo man hruſtı gıƿınnan

rauba bıhrahanen ıbu du dar enıc reht habeſ

der ſi doh nu argoſto quad hıltıbrant oſtar lıuto

der dır nu ƿıgeſ ƿarne nu dıh eſ ſo ƿel luſtıt

gudea gımeınun nıuſe de mottı

ƿerdar ſih hıutu dero hregılo rumen muottı

erdo deſero brunnono bedero uualtan

do lettun ſe ærıſt aſckım ſcrıtan

ſcarpen ſcurım dat ın dem ſcıltım ſtont

do ſtoptun to ſamane ſtaım bort chludun

heƿun harmlıcco huıtte ſcıltı

untı ımo ıro lıntun luttılo ƿurtun

gıƿıgan mıtı ƿabnum