ضلمت كده ليه [Dallemet keda leh] lyrics

م الصبح غرقان في مشاكل

وم البداية اليوم قافل

أستنى في الباشا يعدي

داخللي عكس ومش سائل

قلبي ليه مش مطّمن

باينه يوم.. هندم عليه

هي ضلمت كده ليه.. اللي ودّاني يجيبني

يومي راح في الزحمة يا بيه.. البلد بتعذبني

أنا كنت ناوي أخش يمين

قالولي خش شمال أحسن

أنا قولت دول طبعاً فاهمين

بصيت لقيت نفسي ف مدفن

ده اللي يسأل في بلدنا

ربنا يعوض عليه

هي ضلمت كده ليه.. اللي ودّاني يجيبني

يومي راح في الزحمة يا بيه.. البلد بتعذبني

بالعافية عديت الأتوبيس

باضرب بعيني لقيت زفّة!

وما دام يا سيدي اليوم ده خميس

خد لك معاهم ميت لفّة

هيصة ولا حدّش داري

بالمرار اللي احنا فيه

هي ضلمت كده ليه.. اللي ودّاني يجيبني

يومي راح في الزحمة يا بيه.. البلد بتعذبني

أنا قولت مرة أعمل فاهم

وخلعت م الزحمة مزأطط

ما وعيتش غير في صلاح سالم

فركنت على جنب أعيّط

آه يا غُلبي آيانا يامّه

مش هروّح ولاّ إيه

هي ضلمت كده ليه.. اللي ودّاني يجيبني

يومي راح في الزحمة يا بيه.. البلد بتعذبني

ورجعت والشارع مقفول

وزحمة والبيت متحاوط

لمحت واد كده مش معدول

شايلينه قال عامل ناشط

يلاّ سيبك ماهي باظت

يعني هي جت عليه؟

هي ضلمت كده ليه.. اللي ودّاني يجيبني

يومي راح في الزحمة يا بيه.. البلد بتعذبني