Christmas Carols - Gosos de Nadale

Glória a Deus Salbadore

e a sa mama Maria,

dande a su mundu allegria

naschidu est su Redentore.

Sos coros angelicales

faghen festa de cuntentu,

totus, in custu naschimentu,

si turban sos infernales.

Sos astros celestiales

multiplican su lugore,

dande a su mundu allegria

naschidu est su Redentore.

In sa celeste altura

si cumparit un’istella

tantu risplendente e bella

chi allegrat sas criaduras.

E disterrat sas tristuras

custu nou risplendore,

dande a su mundu allegria

naschidu est su Redentore.

Anninnia, sole ermosu,

lassa su lagrimare

ca est ora de lis dare

a sos ojos su reposu.

Dromi tue, sole lustrosu

d’eternu risplendore,

dande a su mundu allegria

naschidu est su Redentore.