Passione pro sa musica tenzo dae minore
Jogu a jogu apo comintzadu a cantare.
Est colada sa zente che i’sos rios
Amigos ch’an furadu sos sònnios mios.
Amigos e collegas chi bendides s'ispantu
Gherrades una vida cun mulinos a bentu.
Su cantu est che s’atonzu ‘e sa rundine:
Si che 'olat su cantante e restat s’homine.
Pro unu punzu de ’inari o unu pratu de gloria
De bos bender s’amigu non tenides timoria.
Mantenidebos sa fama e sa gloria e
Si cherides dae cras bos jamo “Vosté”
No nde cherzo de vana gloria
Non cherzo passare a s’istoria
Mi cuntentat solamente
S’affetu sintzeru de paga zente.
No nde cherzo falsos risos
Indeorados paradisos
Faulas o falsa amistade
Ma sa santa beridade.
Ses prenu de amigos si bestis corona
Ma de tempus pro te si istas male no nd’an.
Amigos pagos e bonos, su ditzu antigu
Narat chi agatas tesoro si agatas un amigu.
Ammentade chi Giuda pro sos trinta dinares
Non b’at pensadu meda a si ‘ender su Segnore:
A s’homine chi s’istima la rezit gai
In su tempus una paga no li mancat mai
No nde cherzo de vana gloria
Non cherzo passare a s’istoria
Mi cuntentat solamente
S’affetu sintzeru de paga zente
No nde cherzo falsos risos
Indeorados paradisos
Faulas o falsa amistade
Ma sa santa beridade.
Passione pro sa musica mi faghet cantare
Est s’istima 'e sa zente chi mi faghet sighire.
Zente ch’azes dadu affetu a su coro meu,
In bona sorte e fortuna bollu torret Deus.