Chi mi frena in tal momento? [Breton translation]

EDGARDO

Piv am stardo da seurt ampoent?

Piv a dorro e lusk d'am c'hounnar?

He foan, he spont

a zo prouennoù eus he morc'hed.

Met par d'ur rozenn dizour

e chom en etremar etre buhez ha marv.

Trec'het on, fromet on!

Da garout a ran, plac'h dizanaoudek, da garout evelkent!

ENRICO

Piv a dalc'ho ma fulor

ha ma dorn, lammet anezhañ d'am c'hleze?

Savet eo ur c'hri e-kreiz ma c'halon

en erbed d'ar paour-kaezh-se.

Eus ma gwad eo-hi! Traiset em eus anezhi!

En etremar eo etre buhez ha marv!

Ac'h! Ha n'houllan ket mougañ

ar morc'hed e-barzh ma c'halon.

LUCIA

Spi am boa e vefe troc'het

ma buhez gant ar spont,

hogen n'emañ ket ar marv a-du ganin.

Bevañ a ran c'hoazh evit bezañ jahinet.

Kouezhet eo ar mouch diwar ma daoulagad,

traiset on bet gant an neñv hag an douar.

C'hoant am eus gouelañ, ha n'hellan ket:

tec'hout a ra diouzhin ar c'hlemmvan ivez.

RAIMONDO

Drastusat koulz-amzer!

N'hellan ket distagañ komzoù ken!

Seblantout a ra ur goabrenn a spouron

da c'holeiñ bannoù an heol.

Par d'ur rozenn dizour

e chom en etremar etre buhez ha marv.

An nep ne vez ket fromet ganti

en deus ur galon tigr e-barzh e vruched.