Chi è ll'òmmo [Italian translation]

Nun sóngo nu grand'òmmo, nun sóngo nu scienziato.

'A scòla nun sò gghiuto, nisciuno m'ha mannato.

S' i' sóngo intelliggènte? e m'o spiate a mme?

I' sóngo nato a Nàpule, che ne pòzzo sapè’ ?!

Appartengo alla massa... a cchélla fòlla 'e ggènte

ca nun capisce pròprio 'o riésto 'e niénte.

Però ve pòzzo dìcere na còsa:

campanno nòtte e ghiuómo a stu paése

pur’i' me sò 'mparato quacche còsa,

quaccòsa ca se chiamma ummanità.

Sènza sapè nè lèggere e nè scrìvere,

da onèsto cittadino anarfabbèta,

ve pòzzo parlà’ 'ncòpp'a n'argomènto

ca certamènte ve pò interessà: chi è ll'òmmo.

Ll'òmmo è nu pupazzo 'e carne, cu sango e cu cerviéllo,

ca primma 'e venì al móndo (cioè 'ncòpp'a sta tèrra)

madre natura, ca è sèmpe priviggènte,

l'ha miso 'nfunno a ll'ànema, cusuta dint'o còre, na vurzélla

cu dinto tante e tante pupazziélle.

Che saccio: 'o mariunciéllo, na stréga 'e Beneviénto,

nu scienziatiéllo atòmico cu ‘a faccia indisponènte,

nu bèllo Capo 'e Stato vestuto 'a Pulcinèlla;

curtiélle, accètte, strùmmole e quacche sciabbulélla.

Penzanno ca 'o pupazzo nu juómo se fa òmmo,

si se vò divertì , chésto 'o ppò fà; . E cómme?

Scegliènno 'a dint' 'o mazzo ca tène dint' 'a vurzélla,

chélla ca cchiù lle piace fra tutte 'e pazzièlle.

Si po' sentite 'e dìcere: "'0 tale hanno arrestato!

Era uno senza scrùpole, pazziava al peculato.

E trène nun cammìnano? 'A pòsta s'è fermata?".

Chi tène 'mmano 'o strùmmolo, pazzianno s'è spassato.

'0 scienziatièllo atòmico ch'a bómba 'a ten’astretta

"Madònna! - trèmma 'o pòpolo- E si mo chisto 'a jètta?".

Guardate che disgrazia si 'a sciabbulélla affèrra

nu capo ca è lunàtico: te fa scuppià’ na guèrra.

Senza penzà’ ca 'o pòpolo: mamme, mugliere e figlie,

chiàgneno a tant’e llàcreme. Distrutte sò 'e ffamiglie!

A sti pupazze 'e carne affocaggènte

l’avessane educà' cu 'o manganiéllo

oppure la natura priviggénte,

avéss'a fà' turnà’ nu Masaniéllo.

Ma 'e ccòse no... nun càgnano e v'o dich'i' 'o ppecchè :

nuje simmo tanta pècure... facimmo sèmpe "mbeè".