Marzo: nu pòco chiòve
e n'atu ppòco stracqua...
Tòrna a chiòvere, schiòve...
ride 'o sóle cu ll'acqua.
Mo nu ciélo celèste,
mo n'aria cupa e néra...
Mo, d' 'o viérno, 'e ttempèste,
mo, n'aria 'e primmavèra...
Marzo: nu pòco chiòve
e n'atu ppòco stracqua...
N'auciéllo freddigliuso,
aspètta ch'èsce 'o sóle...
'Ncòpp' 'o tturrèno 'nfuso,
suspirano 'e vviòle...
Catarì, che vuó cchiù?
'Ntiénneme còre mio:
Marzo, tu 'o ssaje, si' tu...
e st'auciéllo, songh'io...
Marzo: nu pòco chiòve
e n'atu ppòco stracqua...
Marzo, tu 'o ssaje, si' tu...
e st'auciéllo, sòngh'io...
Marzo: nu pòco chiòve
e n'atu ppòco stracqua...