Canta pe' mme! [English translation]

Canta pe' mme stanotte 'na canzona,

Tu ca sì bella e tiene 'a voce d'oro!

Cantammella stanotte e ca si moro,

Moro sentenno 'na bella canzona!

Canta 'na serenata 'e marenare

C' 'a tantu tiempo nun se canta cchiù!

Mare! Stanotte quanta varche a mare!

Ma tu nun cante. Ma a che pienze tu?

Canta, ca i' t'accumpagno cu 'a chitarra!

Chisà stanotte nun se sceta 'ammore,

Ll'ammore sfurtunato e cantatore

Ca niente vò: 'nu core e 'na chitarra.

Canta, ca è bella Napule addurmuta,

Connola d'oro pe' chi vò sunnà!

Ma tu che pienze sulitaria e muta?

Ma tu ch'aspiette ca nun vuò cantà?

E pecché chiagne si 'a nuttata è bella

E sì figliola e tiene 'a voce d'oro?

Canta pe' me, pe' me ca mme ne moro,

Moro sentenno 'na canzona bella!

Canta, luntana mia, ca sì turnata,

Ca sì turnata e nun te ne può ghì!

Canta, pecché te tengo 'ncatenata,

Pecché tu sola mm'hê 'a vedè murì!