Ammo pusate chitarre e tambure
pecché sta museca s'adda cagnà.
Simmo brigante e facimmo paura
e c’a scuppetta vulimmo cantà,
e c’a scuppetta vulimmo cantà!
E mo’ cantammo na nova canzone
tutta la gente se l'adda 'mparà.
Nuje cumbattimmo p’o Ré Burbóne
‘a terra è ‘a nosta e nun s'adda tuccà,
‘a terra è ‘a nosta e nun s'adda tuccà!
Tutt'e paisi d’a Basilecata
se so' scetate e mo’ stann'a lluttà.
Pure a Calabbria mo’ s'è arrevutata
e stu nemmico o facimmo tremmà,
e stu nemmico o facimmo tremmà!
Chi ha visto ‘o lupo e s' è miso paura
nun sape buono qual'è 'a verità.
‘O vero lupo ca magna ‘e ccriature
è ‘o piemuntese c'avimm'a caccià,
è ‘o piemuntese c'avimm’a caccià!
Femmene belle ca date lu core,
si no brigante ‘o vulite sarvà,
nun ‘o cercate e scurdateve ‘o nomme:
chi ce fa ‘a guerra nun tene pietà,
chi ce fa ‘a guerra nun tene pietà!
Òmmo se nasce, brigante se more
ma fin'a ll'urdemo avimm'a sparà.
E si murimmo menate nu sciore
e na preghiera pe' sta libbertà,
e na preghiera pe' sta libbertà!