بغيت ايام - ميحد حمد
بغيت أيام محسوبه حسايب
ألوف ديــــار فيها القلب ذايب
لعل أشوف طيف(ن) من حبيبي
وأناظـر وجه عني صار غايـب
وأضم اورود فيها لون خده
واقبل دار سكونها الحبايب
واكحل بالمراتع مقلت اللي
وابرد نفس صابتها مصايب
يسافر في دروب الحب فكري
يعيد ايام ذكراها حصايب
يردد وين يا ديرة صبانا
زمان الود وايام(ن) اطايب
تقول الدار لا تبكي بحسره
صروف الدار فيها من الغرايب
تبدل من توده دون زله
رحل من غير ما يبدي سبايب
تجلد بالصبر ع الهجره مره
ومره خل دمعاتك صبايب
عسى الأيام تجمع شمل حبك
عساه يعود لك من كان غايب