Ballade en vieil langage françois lyrics

Car, ou soit ly sains appostolles (1)

D'aubes vestuz, d'amys coeffez, (2)

Qui ne seint fors saintes estolles

Dont par le col prent ly mauffez (3)

De mal talant (4) tous eschauffez,

Aussi bien meurt que filz servans,

De ceste vie cy bouffez : (5)

Autant en emporte ly vens.

Voire, ou soit de Constantinobles

L'emperieres au poing dorez,

Ou de France le roy tres nobles,

Sur tous autres roys decorez, (6)

Qui pour ly grans Dieux aourez (7)

Batist esglises et couvens,

S'en son temps il fut honnourez,

Autant en emporte ly vens.

Ou soit de Vienne et Grenobles

Ly Dauphin, le preux, ly senez, (8.)

Ou de Dijon, Salins et Doles

Ly sires et ly filz le plus ainsnez, (9)

Ou autant de leurs gens prenez,

Heraux, trompectes, poursuivans, (10)

Ont ilz bien boutez soubz le nez? (11)

Autant en emporte ly vens.

Princes a mort sont destinez,

Et tous autres qui sont vivans:

S'ils en sont courciez n'atainez, (12)

Autant en emporte ly vens.