Bûka Cihanê lyrics

welatê min tiwî bûka cîhane

Hemî bax û bihuşt û merg û kanî

Şepal û şeng û şox û naz û gewr î

Gelek şêrîn û rind û pir ciwan î

Serî taca Selehedînê Kurdî

Enî roj e di birca asîmanî

Du birhên te kevanê Rustemê Zal

Du zulfên te ji tirên qehremanî

Riwê te agirê Zerdeşt û Mezdik,

ji te hêstir û seraba kemûranî

Du levên te kitêba Hecî Qadir,

zimane te ji benda seydayê Xanî

Çena te guhê Cûdî û Hewlêr,

qirik eywan û taxa Kesrewanî

Di sînga te kitêba Zendevista,

memik ferfûr e tê de neqşê manî

Du destên te tixûben tirk û iran,

hero cengê bi tîren zerveşanî

Ji sînga te bi jêr de gelyê Laleş,

ziyaretgeh e bo me her zemanî

Bi nişan û bi nan û xwîn rijandin,

me dest girt û qelen da û tu anî

Serî û pa û zend û bazin tev bi hine,

hemî sor in ji rengê erxewanî

Bi te em şa nebûn ev bû du sed sal,

ji me dengê tivengan çûye banî

Bira, law û bav û ap û pismam,

li ser te hev dikuştin di rengê pehlewanî

ji Loran ta bi Zazan tev bi xencer,

dihatin hev li meydanê beranî

Bi talan û bi kuştin, hem bi sohtin,

me konê şer li ser sînga te danî

Emîr û begler û paşa û axa,

kirin wêran sera û birc û xanî

Li alîkî te deng û ceng û halan e,

li alîkî seydayê Xewsê Sanî

Du derdên me hebûn, dijwar û xedar,

xizanî yek ewê di her nezanî

Weke şêr û piling em diçûn hev,

penêr rovî ji meydanê hilanî

Me ew rojên ciwanî tev bi derdan,

bi zîravî, belengazî û şivanî

Here bûkê pepûkê jar û mestû,

li ser sînga te zava man biyanî

Te reş daye serê xwe ber li ser me,

li rokê dibî pîroz kitanî

CEGERXWÎN e kurê te her dinale,

ji ber jana nezanî û xizanî

Helbest: Cegerxwîn

Muzîk: Xelîl Xemgîn